أولا بالنسبه للزوجه المغربيه :-
تيجي مصر بتأشيره سياحه ودي سهله جداً جداً جداً.
تجيب معاها عقد ازدياد اللي هي شهاده ميلاد بالمصري وحاجه اسمها النسخه الكامله هم عارفين يجيبوها ازاي.
توثقهم خارجيه مغربيه وقنصليه مصريه وهتعرف ليه دلوقتي.
ثانيا بالنسبه للزوج المصري:-
صوره بطاقتك وأصل شهاده الميلاد.
بعد كدا إجراءات الزواج بقى.... نظرا لأن الجواز من المغربيات يلزم ليه موافقه السفاره المغربيه واللي مستحيل تأخذها وعن تجربه وبلاش تحاول تجرب عشان هتضيع وقت سيادتك.
هتروح لمحامي متخصص في زواج الأجانب... وتكتب عنده شرعي في وجود ٢ شهود ويفضل يكون والدك وحد تعرفه.
وهتاخد معاك كل الاوراق اللي ذكرتها فوق بالاضافه لحاجه مهمه وهي إنك تأخذها وتروح الجوازات وتختملها ختم إقامه لمده شهر وده سهل وببلاش وفي وقتها بتاخد وتصور بعدها الباسبور بتاعها (صفحه التأشيرة اللي عليها ختم الدخول وختم الاقامه)
بالاضافه لصورتين والمحامي هيعمل عقد زواج شرعي ويديلك نسخه وهو هياخد الورق كله ونسخه العقد التانيه.
حضرتك هتروح تعمله توكيل انا وهي في الشهر العقاري يفيد بأنه موكل عنك لإنهاء اجراءات الزواج من السيده فلانه وكذلك الأمر بالنسبه ليها.
وتاخد التوكيلات وتروح تديها للمحامي وهو هيرفع دعوى إثبات زواج في محكمه الأسره.
وبيتحدد جلسه تقريبا بعد شهر وحضرتك مش مطلوب منك تحضر حاجه خالص.
المحامي بيروح الجلسه ولو شاطر بياخد حكم ثبوت الزواج ف نفس الجلسه وبياخد فتره شهر للطعن وطبعا مفيش طعن فبعد شهر بيروح يخلص باقي الإجراءات عشان يعملك وثيقه زواج يثبتها في السجل المدني ويعملك القعد الكمبيوتر وكل ده هو بيخلصه.
الموضوع بياخد حوالي ٣ شهور ويكون معاك العقد.. وبكدا تكون تممت إجراءات الزواج بمغربيه على أرض مصر قانوني وشرعي ١٠٠٪ وتقدر تعملها إقامه وتقدملها على الجنسيه ودي هنتكلم عنها في موضوع تاني.
ارجو إني اكون قدرت اشرح بالمختصر المفيد وده عن تجربه في يناير ٢٠٢٠ الحمدلله وتمت بنجاح بنفس التفاصيل دي.
بالتوفيق للجميع ومتنساش تخلي بالك منها ودي أمانه في رقبتك تحترمها وتحافظ عليها وتراعي بعدها عن أهلها عشان خاطر بتحب سيادتك.
🇪🇬♥️🇲🇦
No comments:
Post a Comment